Á morgun, 12. ágúst, verður sólmyrkvi á Íslandi og meira að segja almyrkvi á vesturhluta landsins. Það er afar sjaldgæft og næsti almyrkvi hér á landi verður ekki fyrr en árið 2196. Þó að veðurspáin sé nú reyndar ekkert alltof góð þá höldum við ennþá í vonina, ekki satt? Annars verðum við bara öll að syngja "Sól, sól skín á mig. Ský, ský burt með þig!" til að fá betra skyggni. En ég gerði lítið lag til að útskýra aðeins fyrir börnunum hvað er á ferðinni þótt það hafi líklega ekki farið fram hjá neinum hér á landi. Textinn er sunginn við sömu laglínu og "Út um mó".
Tungl og sól, tungl og sól!
Fylgjumst með þeim uppi’ á hól.
Þegar tunglið fyrir sólina fer,
sólmyrkvi þá verður hér!
Mundu þá, til að sjá,
sólmyrkva-gleraugu að setja á.
Þegar tunglið fyrir sólina fer,
verður þú að gæta að þér!
Þá verður fljótt um daginn nótt.
Í myrkrinu er allt svo hljótt.
Þegar tunglið fyrir sólina fer,
vil ég vera hér með þér!
Lag:"Út um mó"
Texti: Birte og Baldur, ágúst 2026
Lagið varð til í gær með aðeins öðruvísi texta, en þegar ég fór að nota það á Aðalþingi í dag lagaði ég það aðeins til og ákvað að gera lítið myndskeið með því.
Smellið hér til að prenta út.
Ég ætla að lauma hér inn stuttri afmæliskveðju til sonar míns hans Matthiasar sem á stórafmæli á morgun, einmitt þegar almyrkvinn skellur á. Matthías er eðlisfræðingur og mun reyna að endurtaka Eddington-tilraunina sem fyrst var framkvæmd árið 1919 til að sýna fram á gildi afstæðiskenningar Einsteins.
Það er annars gaman að segja frá því að Matthias sá fyrsta sólmyrkvann sinn daginn fyrir þriggja ára afmælið, þegar hann var á leikskóla í Danmörku. "Månen gik ind i solen", útskyrði hann fyrir okkur foreldrunum þegar hann kom heim.
Sláðu inn leitarorð hér að neðan.
